தமிழ் ஒருங்குகுறி தட்டச்சு ஓர் அறிமுகம்

தமிழ் ஒருங்குகுறி தட்டச்சு ஓர் அறிமுகம்
முனைவர் தமிழ்ப்பரிதி மாரி
உதவிப்பேராசிரியர், இதழியல் மற்றும் மக்கள் தொடர்பியல் துறை, பெரியார் பல்கலைக்கழகம், சேலம்-636011.
மின்னஞ்சல்: tamil@parithi.org
அலைப்பேசி: +91-7299397766

 

இன்றையச்சூழலில் மக்கள் அனைவரும் ஏதோ ஒரு வகையில் கணிப்பொறியோடு தொடர்புடையவர்களாக இருந்து வருகின்றோம். நாளுக்கு நாள் அரசு நிறுவனங்கள், கல்வி நிறுவனங்கள், தனியார் நிறுவனங்களின் செயல்பாடுகள் கணிப்பொறி சார்ந்ததாக மேம்பட்டு வருகின்றன. அலைபேசிகள் தற்போது கணிப்பொறியின் பயன்பாடுகளோடு பெருமளவில் சந்தையில் கிடைக்கின்றன. அரசின் மின்னாட்சி (e-governance) செயல்பாடுகளுக்கு கணிப்பொறிகளும் அலைபேசிகளும் பலகைக் கணினிகளும் (Tablet PC) மடிக்கணினிகளும் (Laptop) பெருமளவில் உறுதுணையாக உள்ளன. கணிப்பொறி, அலைபேசி, பலகைக்கணி, மடிக்கணினி ஆகியவற்றில் ஒருவர் ஆங்கிலத்தில் மொழி உள்ளீட்டைச்செய்வது மிக எளியச்செயல் ஆனால், மேற்குறித்தக் கருவிகளில் தமிழ் உள்ளீட்டை (Tamil Input) ஒருவர் செய்வதற்கு தமிழ் உள்ளீட்டை கற்கவும் பழகவும் வேண்டியுள்ளது. கணிப்பொறி மற்றும் கணிணிச் சார்ந்தக் கருவிகளிலும் அலைபேசியிலும் தமிழ் உள்ளீட்டிற்கு தமிழ் எழுத்துருவை (font) நிறுவினால் (installation) மட்டுமே தமிழில் தட்டச்சு (typing) செய்ய இயலும். கணிப்பொறி மற்றும் கணிணி சார்ந்தக் கருவிகளிலும் அலைபேசியிலும் தமிழ் உள்ளீட்டை தமிழ் ஒருங்குகுறி எழுத்துருக்கள் (Tamil Unicode Fonts) மிக எளிதாக்கி உள்ளன.

தமிழ்நாட்டு அரசு தமிழ் ஒருங்குகுறி எழுத்துருக்களை மட்டுமே அலுவலகச்செயற்பாடுகளுக்குப் பயன்படுத்த ஆணை வெளியிட்டுள்ளது. இந்நிலையில் அனைத்து நிலைகளிலும் தமிழ் ஒருங்குகுறிப் பயன்பாட்டிற்கான வழிகளை இக்கட்டுரை வழங்குகின்றது.

தமிழ் எழுத்துருக்களைத் தரவிறக்கம் செய்யும் இணைப்பு
http://www.tamilvu.org/tkbd/tau_fonts.zip என்னும் இவ்விணைப்பின் வாயிலாக 15 வகையான தமிழ் ஒருங்குகுறி எழுத்துருக்களைத் தரவிறக்கி நாம் பயன்படுத்தலாம்.

தமிழ் ஒருங்குகுறி எழுத்துருக்களை நம் கணிப்பொறியில் சேர்க்க
உங்களின் கணிப்பொறியின் எழுத்துருக்கள் (fonts) என்னும் அமைப்பில் நீங்கள் தரவிறக்கம் செய்த எழுத்துருக்களை சேர்க்கவும்.

தமிழ் ஒருங்குகுறி விசைப்பலகைகள் (Tamil Unicode keyboard)
தமிழா.காம்  (தமிழா) என்னும் இணையத்தின் வாயிலாக்க எ-கலப்பை என்னும் தமிழ் விசைப்பலகையை பின்வரும் இணைப்பின் வழியாகப் பெறலாம். https://github.com/thamizha/ekalappai/releases/download/3.0.4/eKalappai-3.0.4-installer.exe

இ-கலப்பை, (e-Kalappai) இம்மென்பொருளை தரவிறக்கம் (download) செய்து, அவற்றை கணினியில் நிறுவி (instalation) தமிழ் உள்ளீட்டைச் செய்யலாம். இம்மென்பொருளில் தமிழ்99 (Tamil99), தமிழ் ஆங்கில ஒலிபெயர்ப்பு (Phonetic), தட்டச்சுப்பொறி(Typewriter), பாமினி (Bamini), இன்ஸ்கிரிப்ட் (Inscript)ஆகிய முறைகளில் தமிழ் ஒருங்குகுறியை உள்ளீடலாம்.

அலைபேசிகளில் தமிழ்த்தட்டச்சினைக் கற்க
https://youtu.be/a_tcrgLOn7s என்னும் இணைப்பின் வாயிலாக தமிழ்99 முறையைக் கற்கலாம்.

குரல் வாயிலாகத் தமிழ்த்தட்டசுக் கற்க
https://youtu.be/ddK-EVTc_J0 என்னும் இணைப்பின் வாயிலாக குரல் உள்ளீட்டின் வழியாக தமிழ் ஒருங்குகுறியில் தமிழைப் பயன்படுத்தலாம்.

தமிழ் ஒருங்குகுறி எழுத்துருக்களின் நன்மைகள்
தமிழ் ஒருங்குகுறி எழுத்துருக்கள் தமிழ்நாட்டு அரசால் ஏற்பளிக்கப்பட்டவையாகும். தமிழ்99 விசைப்பலகையை தரப்படுத்தியுள்ள தமிழக அரசு, அவ்விசைப்பலகையே தமிழக அரசு அலுவலகங்களில் பயன்படுத்த அறிவுறுத்தியுள்ளது. தமிழ் ஒருங்குகுறி எழுத்துருக்கள் தமிழ் இணையப்பயன்பாட்டிற்கு மிகவும் உகந்தவை ஆகும். இந்த எழுத்துருக்களைக்கொண்டு கணிப்பொறியில் அனைத்துப்பணிகளையும் செய்யலாம். தமிழில் மின்னஞ்சல் (Tamil emailing)செய்ய, தமிழில் இணையதளங்களை உருவாக்க, தமிழில் சொற்செயலியைச் செயற்படுத்த (word processor), தமிழ்ச்சொற்களை அகரவரிசைப்படுத்த (alphabetical sorting), தமிழில் தேடுபொறியைப் (search engine) பயன்படுத்த, சொற்பிழை நீக்க, சந்திப்பிழைத்திருத்த, நிரலாக்க மொழியாகப் பயன்படுத்த என பல்வேறுநிலைகளில் பயன்படுத்தலாம்.

தமிழ் ஒருங்குகுறி மென்பொருட்கள் (Tamil Unicode software)

தமிழ் ஒருங்குகுறி எழுதிகள்/ விசைப்பலகைகள் என்னும் இம்மென்பொருட்கள் கணினிகளில் ஒருங்குகுறி தமிழ் உள்ளீட்டிற்காக உருவாக்கப்பெற்றுள்ள மென்பொருட்கள் ஆகும். இந்த மென்பொருட்களை மிக எளிதாக கணினியில் நிறுவலாம். கணிப்பொறிகளிலும், மடிக்கணினிகளிலும் ஒருங்குகுறி தமிழில் தட்டச்சு செய்ய பின்வரும் மென்பொருள்களுள் ஒன்றினைத் தரவிறக்கம் (download) செய்து, அவற்றை கணினியில் நிறுவி (installation) தமிழ் உள்ளீட்டைச் செய்யலாம்.

என்ஹெச்எம் ரைட்டர், (NHM Writer) இம்மென்பொருளைத் https://indiclabs.in/products/writer/ என்னும் இணைப்பில் தரவிறக்கம் (download) செய்து, அவற்றை கணினியில் நிறுவி (instalation) தமிழ்99, தமிழ் ஆங்கில ஒலிபெயர்ப்பு (transliteration), தமிழ் பழைய தட்டச்சுப்பொறி (Old typewriter), பாமினி, தமிழ் இன்ஸ்கிரிப்ட் (Inscript), தமிழ்99 டேஸ், தமிழ் ஒலிபெயர்ப்பு டேஸ் (TACE) ஆகிய முறைகளில் தமிழ் உள்ளீட்டைச் செய்யலாம்.

தமிழ் விசை (Tamil Visai) இம்மென்பொருளை https://www.microsoft.com/en-us/p/tamil-visai/9wzdncrdf11m?activetab=pivot:overviewtab என்னும் இணைப்பில் தரவிறக்கம் (download) தமிழ் ஒருங்குகுறியில் தட்டச்சுசெய்யப் பயன்படுத்தலாம்.

தமிழ்99 விசைப்பலகையைக் கற்க

டபல்யூ3தமிழ் ,(w3tamil)என்னும்  இம்மென்பொருள் https://wk.w3tamil.com/என்னும் இணைப்பில் பயன்படுத்தலாம். ஒருங்குகுறித்தமிழை தமிழ்99 என்னும் விசைப்பலகை முறையை மட்டும், வலைத்தளத்தில் தட்டச்சு செய்துபழகும் வகையில் நேரலை விசைப்பலகையை வடிவமைத்துள்ளது. இவ்வலைதளத்தை தட்டச்சுப்பயிற்சிக்குப் பயன்படுத்தலாம்.

தமிழ் எழுத்துரு மாற்றிகள் (Tamil Unicode converters)

தமிழ் எழுத்துரு மாற்றிகள் என்பது மரபார்ந்த தமிழ் எழுத்துருக்களை தமிழ் ஒருங்குகுறியாகவும், தமிழ் ஒருங்குகுறி எழுத்துருக்களை மரபார்ந்த எழுத்துருக்களாகவம் மாற்றப்பயன்படும் மென்பொருட்கள் ஆகும்.

பொங்கு தமிழ் வலைதளத்தில் இண்டோவேர்டு (Indoweb), முரசொலி (Murasoli), வெப் உலகம் (Webulagam), தினத்தந்தி (Thinathanthi), தினமணி (Dinamani), தினபூமி (Thinaboomi), அஞ்சல்(Anjal), தட்ஸ் தமிழ் (Thatstamil)(LIBI), அமுதம்(Amudham/Dinakaran), மயிலை(Mylai), விகடன் (Vikatan(old)), டேப் (Tab), டேம்(Tam)குமுதம்/ விகடன் (kumudam/vikatan) பாமினி (Bamini), டிஎஸ்சி (TSC), ரோமனைஸடு (Romanised), கோல்ன்(koeln), அனு கிராபிக்ஸ் (anu Graphics (Pallavar)), நக்கீரன் (nakkeeran(senthamizh)) ஆகிய எழுத்துருக்களை ஒருங்குகுறித்தமிழில் எழுத்துரு மாற்றம் செய்யலாம்; இதனால் மரபான எழுத்துருக்களை ஒருங்குகுறியில் மாற்றி பல வகைகளில் இந்த பனுவல்களாகப் பயன்படுத்தலாம்.

என்ஹெச்எம் கன்வெர்ட்டர் (NHM Converter) என்னும் இம் மென்பொருளைத் தரவிறக்கம் செய்து, அவதை கணினியில் நிறுவினால் பாமினி, டையகிரிடிக், ஸ்ரீலிபி, சாஃப்ட்வியூ, டேப், டேம், திசுகி, ஒருங்குகுறி, வானவில் ஆகிய எழுத்துருக்களை தமிழ் ஒருங்குகுறியிலும் தமிழ் ஒருங்குகுறி எழுத்துருக்களை பாமினி, டையகிரிடிக், ஸ்ரீலிபி, சாஃப்ட்வியூ, டேப், டேம், திசுகி, ஒருங்குகுறி, வானவில் ஆகிய எழுத்துருக்களாகவும் மாற்ற இயலும்.

தமிழ் ஒருங்குகுறி எழுத்துருக்களைத் தரவிறக்கம் செய்ய

தமிழ் நாடு மின்னணுக்கழகம் வழங்கும் தமிழ் எழுத்துருக்கள்
தேசியத் தகவலியல் நடுவம் வழங்கும் தமிழ் எழுத்துருக்கள்
தெற்காசிய மொழிவள நடுவம் வழங்கும் தமிழ் எழுத்துருக்கள்
தமிழ் ஒருங்குகுறி எழுத்துக்கூடம் வழங்கும் தமிழ் ஒருங்குகுறி எழுத்துருக்கள்

அலைபேசியில் தமிழ் உள்ளீட்டிற்கு (Tamil input for mobile phones)

செல்லினம் (Sellinam) அண்ட்ராய்டு இயங்குதளம் உள்ள அலைபேசியில் தரவிறக்கம் செய்து நிறுவி settings-இல் மொழி மற்றும் உள்ளீடு (Languaguage and Input) என்னும் விருப்பத்தேர்வில் தமிழ் விசை என்று தெரிவு செய்தால் அலைபேசியின் விசைப்பலகையில் தமிழ்99, தமிழ் ஒலிபெயர்ப்பு, தமிழ் ஒலிபெயர்ப்பு (ஆங்கில எழுத்துக்கள்) ஆகிய முறைகளில் தமிழை உள்ளிடலாம். சொற்களைக் கோக்கும் போது, அந்தச் சொற்களுக்கு ஏற்றப் பரிந்துரைப் பட்டியலின் (suggestion list) தோற்றம் அஞ்சல் மற்றும் கையடக்கத் தமிழ்-99 விசைப்பலகை அமைப்பைக் கொண்ட உள்ளீட்டு முறை மின்-அஞ்சல், குறுஞ்செய்தி, டிவிட்டர், ஃபேஸ்புக் போன்ற அனைத்துச் செயலிகளிலும் நேரடியாகத் தமிழில் உள்ளிடும் வாய்ப்பு, தமிழ் மட்டுமன்றி ஆங்கிலத்திலும் பரிந்துரைப் பட்டியலுடன் உள்ளிடும் வசதி – இதன் வழி கருவியின் முதன்மை உள்ளீட்டு முறையாக செல்லினம் அமையும் வாய்ப்பு ஆகியன உள்ளன.

ஆப்பிள் நிறுவனத்தின் மெக்கிண்டாஷ் கணினிகளில் மட்டும் அல்லாது, ஐ-போன், ஐ-பேட், ஐ-பாட் டச் மற்றும் ஆப்பிள்-டிவி கருவிகளிலும் முரசு அஞ்சலில் உள்ள தமிழ் எழுத்துருக்கள் சேர்க்கப்பட்டுள்ளன. அதனோடு, எச்.டி.சி. நிறுவனம் இந்தியாவில் வெளியிடும் அவர்களின் (ஆண்டிராய்டு வகை) கையடக்கக் கருவிகளிலும் முரசு அஞ்சலின் எழுத்துருக்களும் தமிழ் உட்பட மற்ற இந்திய மொழிகளுக்கான உள்ளீட்டு முறைகளும் சேர்க்கப்பட்டுள்ளன.
 

செல்லினத்தின் கூறுகள் சில கையடக்கக் கருவிகளில் இயல்பாகவே சேர்க்கப்பட்டுள்ளது. எச்.டி.சி. (Tamil input in HTC mobiles) நிறுவனத்தின் ஆண்டிராய்டு கருவிகளிலும் ஆப்பிள் நிறுவனத்தின் ஐ.ஒ.எசின் (iOS 7) ஏழாம் பப்பிலும் "முரசு அஞ்சல்", "தமிழ் 99" ஆகிய இரண்டு தமிழ் விசைமுக அமைப்புகளும் சேர்க்கப்பட்டுள்ளன. ஐ.ஒ.எசில் இயங்கிய செல்லினத்தைக் கொண்டு மற்றச் செயலிகளில் நேரடியாகத் தமிழில் உள்ளிட இயலவில்லையே என்ற குறையை ஐ.ஒ.எசின் ஏழாம் பதிப்பு நீக்கியுள்ளது.
 

தமிழ் விசையை (Android TamilKey) அண்ட்ராய்டு இயங்குதளம் உள்ள அலைபேசியில் தரவிறக்கம் செய்து நிறுவி settings-இல் மொழி மற்றும் உள்ளீடு (Languaguage and Input) என்னும் விருப்பத்தேர்வில் தமிழ் விசை என்று தெரிவு செய்தால் அலைபேசியின் விசைப்பலகையில் தமிழ்99, தமிழ் ஒலிபெயர்ப்பு ஆகிய முறைகளில் தமிழை உள்ளிடலாம்.

ஜிபோர்டு வாயிலாகத் தமிழ் உள்ளீடு: 

ஜி போர்டு என்னும் செயலியின் வாயிலாக கையில் எழுதுதல், குரல் உள்ளீடு வாயிலாகத் தமிழில் உள்ளீடு செய்யலாம்.

Dr. Thamizhpparithi Maari | tamil@parithi.org | 7299397766